بقلم: نهى احمد علي
دمعت عينا (مجدي) وهو يتذكر للمرة السابعة عشرة رد (نرمين) عليه عندما صارحها بحبه لها:
- آنسة (نرمين)
- يس
- سلاموا عليكوا
- هاي....
- أنا....ا....أنا
- خلَص....
- أنا معجب بيكي و......
قاطعتني ضحكتها الساخرة المائعة وحطت يدها في جيب بنطلونها الاسترتش وقالت:
- انت؟ انت معجب بيا أنا؟!
- ايوه ونفسي أتكلم معاكي و.....
- كمان تتكلم معايا I'm sorry انت مش روش....
وتركتني ورحلت وأنا لا افهم وروحت وما زلت لا افهم....ووجدت الحل.... عديت على صاحبي (وائل) وحكيت له على كل حاجة فضحك أوي السافل وقال:
- انت الغلطان من الأول لو كنت قلتلي كنت قلتلك تعمل ايه....
- كنت هتقوللي ايه يعني؟؟
وضع رجل على رجل فظهر قطع في بنطلون البيجامة المخطط فشخطت فيه وقلتله ينزل رجله.... وهو ينزلها طار شبشبه الزنوبة ليستقر في حجر العبد لله....
- لم حاجتك يا ابن العبيطة انت.......
- ايه يا (أبو الأمجاد) واحدة واحدة علينا أمال ما أنا بمخمخ لك اهه....
- ايه بقى الحل دلوقتي؟
- الحل انك تبقى روش.....
- اعمل ايه يعني؟
- ده هيتم على مراحل، أولا: لازم تلبس لبس غير اللي انت لابسه ده.......
- هو أنا لابس (لاسه) يعني ما انا لابس قميص حرير وبنطلون اهه، والقميص مشجر كمان يعني هي دي مش... مش.... هو المصدر بتاع روش ايه؟
- المصدر؟ هه روشنة يا خويا....... ثم ايه الهبل ده؟ ايه القميص بتاع النساجون الشرقيون اللي انت لابسه؟ وايه البنطلون العر ده؟!
- يا معفن أنا بنطلوني عره، وقميصي من عند النساجون الشرقيون.....
- بصراحة اّه، وده كوم والمركبتين اللي في رجليك كوم تاني يا عم دي شبه جزمة فطوطة.......
- يعني انت شايف إن هوه ده السبب في رفض (نرمين) ليا؟
- ده واحد من الأسباب......
- طب البس ايه؟
- بنطلون باجي أو صاعقة وتي شيرت كات ولا كوتونيد ولا مكس ولا فيرساتشي وجزمة كوتشي.
- هه؟!
- ايه يابا البلاهة اللي اترسمت على وشك دي؟ هشرحلك بعدين.
- هو عشان انت ابن ناس أعلياء هتتأنعر على العبد لله، اكمن أبوك موظف درجة خامسة وأبويا درجة 114.
- لازم تتكلم بطريقة مروشنة في ألفاظ معينة لو قلتها البت هتعرف انك روش.
- زي ايه؟
- مثلا كلمة (بيئة) يعني واطي ودي شتيمة روشة وكامة (كفحتجه) يعني بلطجة وكلمة (نهوبص) و (نهيس) يعني نقول أي كلام هاه كله في الايته؟
- نعم؟!
- يعني كله تمام؟
- اّه ....
- بالنسبة لثقافتك.... لازم تبقى ثقافة روشة يعني تسمع شرايط كاسيت روشة تشوف أفلام فيديو روشة (طبعا انت فاهم قصدي) وتروح أماكن روشة وتسرح شعرك يطريقة روشة وتحلق دقنك بطريقة روشة.
- حيلك..... حيلك.... واحدة واحدة شرايط كاسيت ايه دي اللي اسمعها؟
- (مايكل جاكسون) و (مادونا) و (بابا اوبح) والله له وقريب ولا بعيد والأغاني دي... وأنا عليا الشرايط... وتروح النادي اللي هي مشتركة فيه وتغني قدامها الأغاني دي وتلعب تنس وتقص شعرك زي كاظم الساهر وتحلق دقنك زي دوجلاس و........
- استنى بس.... منين ده كله.... ما انت راسي ع البير وغطاه....
- عيب يا جدع.... إحنا اخوات كله عليا... وهنبدأ التنفيذ من دلوقتي يلا ننزل نشتريلك هدوم جديدة بدل هدومك دي اللي طالعة من بق كلب....
- أنا روش!
بقيت روش.... البنات هيموتوا عليا، أي حد دلوقتي يعرف (مجدي أبو المجد).... أي بنت تسمع اسمي تدوخ.... ذليت (نرمين) اللي جت تتذلل لي.... قلتلها إنها بيئة واني مقدرش امشي إلا مع واحدة روشة.... وبكت وسمعت بعد كده إن جالها انهيار عصبي....
لا حول ولا قوة الا بالله.....
- I'm sorry كلاكيت تاني مرة:
جاءت فتاة اسمها (ماجدة) ودار بيننا الحوار التالي (اللي عمركم ما سمعتوه قبل كده):
- أستاذ مجدي.
- يس.......
- مساء الخير....
- هاي....
- أنا..ا....أنا....
- خلَصي....
- أنا معجبة بيك و....
قاطعتها بضحكتي الساخرة وحطيت ايدي في جيب بنطلوني (الباجي) وقلت:
- انتِ؟ انتِ معجبة بيا انا؟!
- ايوه.... ونفسي أتكلم معاك.....
- كمان تتكلمي معايا I'm sorry انت مش روشة....
